23.02.2026
Í skýrslunni árið 2024 voru lagðar fram samtals fjórar ábendingar til heilbrigðisráðuneytis. Eftirfylgnin leiddi í ljós að ráðuneytið vinnur nú þegar að úrbótum sem gætu komið til móts við tvær þeirra. Annars vegar ábendingu um að setja þurfi skýra stefnu og taka skýra forystu í málefnum er varða fíknivanda. Hins vegar ábendingu um að bæta þurfi aðgengi að meðferðum og þjónustu. Enn er þó of snemmt að segja til um endanlegan árangur þeirra aðgerða sem gripið hefur verið til. Ríkisendurskoðun telur að heilbrigðisráðuneyti eigi enn nokkuð í land varðandi úrbætur vegna hinna tveggja ábendinganna. Þær lúta annars vegar að því að efla þurfi upplýsingaöflun og yfirsýn um þróun vandans, en hins vegar að því að formfesta þurfi kröfur og viðmið um viðhaldsmeðferð við ópíóíðafíkn.
Ríkisendurskoðun mun fylgja skýrslunni eftir með ítarlegri hætti þegar u.þ.b. þrjú ár verða liðin frá útgáfu hennar.
Fyrsta hraðúttektin
Þess má geta að skýrslan um ópíóíðavandann var fyrsta hraðúttekt Ríkisendurskoðunar, en slíkar úttektir miða að því að upplýsa Alþingi, stjórnsýslu og almenning um mál eða málefni sem með einhverjum hætti varða starfsemi ríkisins eða almannahag. Munurinn á hraðúttektum og hefðbundnum stjórnsýsluúttektum er einkum sá að í hinum fyrrnefndu er ekki endilega leitast við að meta frammstöðu stjórnvalda, hvort þau sinni verkefnum sínum á hagkvæman, skilvirkan og árangursríkan hátt. Í staðinn er markmiðið fyrst og fremst að taka saman og leggja fram staðreyndir með skjótvirkum hætti.
Um eftirfylgni Ríkisendurskoðunar
Ríkisendurskoðun fylgir eftir ábendingum sem settar eru fram í stjórnsýsluúttektum embættisins með skipulegum hætti í samræmi við viðurkennda endurskoðunarstaðla. Fyrri eftirfylgni fer jafnan fram 6–12 mánuðum frá birtingu skýrslu þar sem leitast er við að kanna hvort viðkomandi aðilar vinni með markvissum hætti að úrbótum í samræmi við ábendingar Ríkisendurskoðunar. Niðurstöðum og ábendingum embættisins er svo fylgt eftir með ítarlegri hætti um þremur árum eftir að skýrsla er birt.