Útgefið efni > Eftirfylgni: Tollframkvæmd vegna landbúnaðarafurða

Útdráttur skýrslu

Helstu niðurstöður

Ríkisendurskoðun birti skýrsluna Tollframkvæmd vegna landbúnaðarafurða í febrúar 2022. Þar voru samtals settar fram fimm tillögur til úrbóta sem beint var til fjármála- og efnahagsráðuneytis og Skattsins. Í nóvember 2025 hafði verið komið að fullu til móts við þrjár tillögur af þessum fimm og við eina tillögu að hluta. Hins vegar vantaði mikið upp á að komið hefði verið til móts tillögu þar sem ráðuneytið og Skatturinn voru hvött til að endurskipuleggja og efla tolleftirlit og tollendurskoðun.

Tillögur í skýrslunni 2022	Mat Ríkisendurskoðunar á viðbrögðum	Ábyrgðaraðilar
Ráðast þarf í heildstæða endurnýjun tölvukerfa tollasviðs Skattsins.	Komið hefur verið til móts við tillöguna að hluta. Unnið hefur verið að úrbótum á kerfunum en ekki hefur farið fram heildstæð endurnýjun á þeim.	fjármála- og efnahagsráðuneyti og Skatturinn
Setja verður gæði gagna í forgang. Töluvert vantar upp á áreiðanleika og nákvæmni upplýsinga í tollskýrslum.	Komið hefur verið til móts við tillöguna. Gripið hefur verið til ýmissa aðgerða til að stuðla að aukinni nákvæmni og áreiðanleika tollskýrslna.
Endurskipuleggja og efla þarf tolleftirlit og tollendurskoðun.	Ekki hefur verið komið til móts við tillöguna. Ekki verður séð af þeim gögnum sem Ríkisendurskoðun hefur aflað að tolleftirlit og tollendurskoðun hafi verið efld.
Vöruskoðun landbúnaðarafurða verði gerð víðtækari og að viðvarandi verkefni tollasviðs Skattsins.	Komið hefur verið til móts við tillöguna. Aðferðir við greiningu á þörf fyrir vöruskoðun hafa verið efldar.
Yfirstjórn tollamála þarf að tryggja samræmda tollframkvæmd og leysa úr álitamálum. Tryggja þarf að reglulega sé fjallað um álitamál í tollframkvæmd á fundum framkvæmdastjórnar Skattsins.	Komið hefur verið til móts við tillöguna.